الجمعة، 19 أكتوبر 2012

المعذبون في السجون ذنبهم برقبة اباءهم

بالاونة الاخيرة سمعت حادثين منفصلين حول استلام جثتين لمعتقلين من الطب العدلي والسبب طبعا التقنيات الحديثة المستخدمة بالتحقيق وكشف المجرمين ومعروفة للجميع وهي اكل كفخ وسحل واما موت او الاعتراف جبرا .. المهم .. التعذيب بالسجون شي معتاد ومعروف من ايام القائد الضرورة وحتى قبله لربما الموضوع جذوره توصل لابن المقفع لما تم قتله بطريقه بشعه وهي ان تم اجباره على اكل لحم جسمه بعد شواءه من قبل الخليفة العباسي الذي نتغنى ببطولاتهم

المسألة لاتتعلق بحكومة المالكي او صدام او شخص او حدث الموضوع مرتبط بثقافتنا كشعوب .. كم من عدنا سمع جملة نسحلكم و نسلخكم ..الخ من هالكلام لما نختلف مع طرف ثاني والجملة تكون عادية ومحببة وكم مرة نطلع نتغنى بقادة ايديهم ملطخة بالدماء بس ماعدنا مشكلة طالما هذه الدماء تخص طرف يخالفني بالرأي او العقيدة
كم مرة سمعنا من ربع صدام كلمة ابو زايد على ايراني تعذب او جاسوس مات بالتعذيب
كم مرة سمعنا من انصار السيد الفلاني طبهم مرض لسني تعذب ومات بالتعذيب
المشكلة بمجتمعنا هو ليس زفضهم لمبدأ التعذيب بقدر منو هو اللي تعذب اذا من ربعي نكوم نحجي بالانسانيات واذا من طرف ثاني فطبه خره وجلب ومات ومن هالحجي
وبعدين شلون تردونا نصير اوادم ونحترم انسانيتنا اذا الاب من يختلف ويا ابنه يرگعه ميت نعال فكيف بيه اذا اختلف مع خصم !!

الجمعة، 13 يوليو 2012

العراق بنظر الحمقى جنة

عندما اتحدث عن خراب العراق اصبح من المعتاد ان اجد اهطل امامي يقول "لايمعود مو لهذه الدرجة الوطن بخير وكاعد يتطور" طبعا هذا لايعني ان هذا الشخص ينكر مايحدث لكن ببساطة الكارثة والخراب في نظره تختلف عن الكارثة والخراب في نظري .. فأنا اجد العراق مقبرة خربة عندما ارى طفلا يموت لأنه لم يجد الدواء المناسب او عائلة مات جميع افرادها بحادث مروري سببه عدم انتظام المرور او بلد تنهب خيراته ولايجد شعبه مسكن .. اما الكارثة بنظر هؤلاء الحمقى هو ان يتقلد احد اعدائهم منصب سياسي او ان يحكمهم شخص من غير طائفتهم او عدم اداء شعائر مناسبة دينية .. هذه الكوارث بنظرهم وهذه الأسباب التي تجعلهم ينتفضون كالكلاب المسعورة في الشوارع بتوجيه من احمقهم الكبير من هذه الطائفة وتلك

الأربعاء، 30 مايو 2012

توضيح مهم بخصوص قانون جرائم المعلوماتية

كثير ماتردد بين المدونين حول خطورة هذا القانون وفي الحقيقة لايوجد هناك ما يدعو الى القلق نهائيا وسأحاول ان اوضح الموضوع بعدة نقاط ادناه :
1 – عملية السيطرة على الانترنت حاليا في العراق شبه معدومة حيث ان شركات الانترنت غير خاضعة للسيطرة الحكومة .
2- مواقع التواصل الاجتماعي جميعا توفر خاصية التصفح الامن وهذا يعني تشفير كل مايخرج ويدخل من معلومات من والى المستخدم ويمكن التعرف على التصفح الامن من خلال عنوان الموقع حيث يبدأ بـ https  بدلا من http   . وهذا مادفع كثير من الحكومات ومنها ايران الى حجب مواقع التواصل الاجتماعي كتويتر والفيس بوك والبلوغر وذلك لعدم السيطرة عليها ومعرفة من هم المدونون فيها بسبب تشفير المعلومات .
3 – الطريقة الوحيدة التي تمكن الحكومة من التعرف على شخصيتك على الانترنت هي من خلال ان تقوم بكاتبة اسمك الكامل وعنوانك وصورة شخصية لك يعني بالمختصر تروح تسلم نفسك للشرطة برجلك .
4-  حتى كتابة الاسماء الصريحة سيجعل من عملية العثور على الكاتب شبه مستحيل وذلك بسبب التشابه الكبير بالاسماء يعني معروفين احنا العراقين كلنا اسمنا "محمد" و "حسين " و"علي " .. الخ لذا لا يوجد حرج من ذكر الاسماء لكن يفضل عدم ذكر المعلومات الشخصية ليس خوفا من الحكومة او جهة سياسيا فقط بل لان شعبنا العظيم لايخلو ابدا من الهمجية يعني ممكن تتناقش بشكل حاد مع شخص ويمكن يسويلك فصل عشائري لانو سبيته هاي اذا مالطشك ببوري وانت طالع من بيتكم "واردة جدا" .
5- التكنلوجيا في العراق جدا ضعيفة وعملية تتبع الاشخاص تعتبر مهمة مستحيلة لفطاحل المخابرات اللي عدنا وانا اقصد بالتتبع هو عندما نستخدم التصفح الغير امن لان التصفح الامن شبه مستحيل تتبعه .
6-  اخير احب ان اطرح سؤال مهم هل ان القوى السياسية الموجودة حاليا بالعراق تحتاج الى قانون لكي تنتقم من منتقديها؟؟؟ اكو شي اسمه "كاتم " اخاف متعرفوه وهو بديل حديث عن "العبوة " .

لهذا يا اخوتي لا داعي لهذه الضجة حول هذا القانون المهم هو عدم ذكر معلومات شخصية تفصيلية واذا جاء احد واخبرني انو هو حر ويريد يذكر اسمه ومعلوماته فاحب اقول له ان االموضوع سيخرج عن دائرة قانون المعلوماتية لانو قبلك صحفيين على ارض الواقع وليس الانترنت تم تصفيتهم بدون الحاجة الى قانون وكلنا نعرفهم .

الانترنت هو منفذنا الوحيد لنشر افكارنا بغض النظر من نشره المهم ان تصل الفكرة .





الجمعة، 18 مايو 2012

ادوس على راسكم بالقنادر

مشهد ليس بغريب ولا جديد شخص  يسوكـ مجموعة اشخاص وهو يكيل لهم السباب والشتيمة "ادوس على راسكم بالقنادر" هكذا يتم التحدث الى طلبة العراق وشبابه الواعد "ابو الغيرة" الشباب اللي يهز الكاع واللي العالم يخاف منه ويخترعون من اسمه حسب ادعاءات ابناءه النشامى
ماالوم ابدا هذا المسمي نفسه عميد بالعكس اشكره جدا  لانو جسد مشهد اختصر بيه حالنا كعراقيين وكيف يتم تكفيخنا وشلون نتمضحك واحنا نترزل وننكفخ وننهان ونمشي ولا كأنما صار شي .. هم هذولة مستقبل العراق المكفخين نيالك ياعراق على هالزلم الخشنة هسه واحدهم اذا تلزمه يخرطلك وطنيات ويظل يدوخني بالكرامة والغيرة طيح الله حظكم ياعفطية ياطلاب النهرين .. عليكم عاار شكبره وهسه اللي انفضح مو هذا العميد لانو كلنا نعرف نوعية اللي يحكمونا بس انتو شوفتو العالم كله احنا من اي ملة لو باقين نتكفخ بلا محد يدري هواي اشرفلنا 

هذا حالنا كلنا كعراقيين ننسحل وتتفجر بينا عبوات يموت النا اخ وصديق وحبيبة ونستمر بحياتنا ولا كأنو صار شي ..  العار عارنا واكو ناس ماتدري بيه انو هو عار اصلااا 



 

الأحد، 13 مايو 2012

هي ليش خربانة؟.



اذا كنت شيعيا فأن سبب الخراب هو البعث الصدامي الكافر طبعا ممكن تضيف عليهم كلمات مثل الوهابية او اذا كنت متدين تكدر تكول الاحتلال الاميركي والمخطط الصهيوني ووباقي القوانة كلنا ندري بيها
اما اذا كنت سنيا فسبب الخراب هو المد الفارسي المجوسي القادم من ايران اضافة الى اميركا واكو ناس مسوية خلطة يكولك اميركا وايران واسرائيل متأمرين علينا
اما اذا كنت تنتمي للتيارات الاخرى كأن تكون شيوعي او قومجي فسبب الخراب متنوع بل ان البعض يذهب بتحليلاته الفذة ليقول ان سبب الخراب هو غضب الرب علينا .. يعني رب العالمين ماغضب على اسرائيل اللي محتلين بيت المقدس وماغضب على اميركا والغرب الكافر كله واجا غضب علينا ..

البعض الاخر يكولك هذا اختبار من رب العالمين .. وهذا النوع من التفكير هو اخطر انواع الاستنتاج يعني يكولك ليش ادوخ روحي عود نموت والحباب يروح للجنة والوكيح للنار ..  لهذا خاليها على الله عسى ماننذبح واحد واحد يكولك هذا اختبار .. مادري مسامعين بشي اسمه عقل الله خلقه وحطه بروسهم المعفنة اللي ماتفكر

المهم بغض النظر عن الاسباب احنا بحياتنا ما تعبنا روحنا شوية حتى نعرف اسباب مصائبنا بس نعرف نولول ورا كل مصيبة شلون وليش ماندري نظل ناكل كفخ وساكتين ومخدرين روحنا بالسوالف العاوية مااريد اكول شنو الي يفتهم هو يعرفها

يعني هسه لو يطلع واحد بنص بغداد يصيح ياشعب العراق ياخوات الـ*حبة اني بكتكم وذبحتكم وطلعت دين امكم همين نظل صافنين عليه .. لهذا لحد يجي يكولي لزمو فلان يبوك لو فلان يقتل لانو مايفيد احنا شعب الاغلبية ماتت غيرتها مع الاسف

السبت، 12 مايو 2012

شعب محتاج تربية قبل التعليم


ماتصور احد يحتاج تليسكوب لو مجهر ذري حتى يكتشف انحطاط التعليم بالعراق .. طبعا كالعادة لمن نتكلم عن هذا الموضوع يكون التحليل سطحي وتبدي الملامة على الحكومة وادائها الفاشل وهذا مو اكتشاف عظيم لانها غنية عن التعريف .. لكن الحقيقة احنا كشعب محتاجين تربية قبل التعليم ابسط شي شوفو نظرة المجتمع للغشاش او الحرامي او اللوكي هذه الصفات طبعا من السمات الطبيعية للفرد العراقي يعني لمن نكول واحد مرتشي كانما دنكول عنده خشم ولا كأنما هو مسوي جريمة وانما وصف طبيعي ويتقبله الجميع  ، وهذا الموضوع نفس الشي للشخص الغشاش او المدرس المرتشي  هذه من ناحية .. من ناحية اخرى شنو قيمة الشهادة بمجتمعنا ؟  اغلب الطلاب لمن يدخل جامعة هدفه الاول والاخير انو يحصل الشهادة مو مهم بالغش وبالرشوة وبالتوسل المهم اخذ الشهادة ولاعلم ولا فهم بحيث لمن الاستاذ يرسب طالب لانه فاشل وغبي عادي تشوف  المجتمع ينظر لهذا الاستاذ على انه شخص حاقد ومعقد ويحارب الطلاب .. قيمة العلم عدنا صفرر وما استغرب ابدا لمن كل العقول الفاهمة هاجرت لانو حشاكم بس المطي يتحمل الوضعية هنا يعني الواحد ينشك حلكه بالدراسة وتاليها يتساوى ويا الحثلة .. واخرتها يتخرج ويتعين حتى يشتغل ويطلعله مدير من منتجات التعليم العراقي الفاخر يشوفه نجوم الظهر من غباءه واخلاقه الزبالة .. خوو الاطباء والصيادلة اللي هم المفروض  قمة التعليم حشا الفاهيمن اللي هجوو منا واحدهم عبالك يتعامل ويا صخول مو بشر يعني حسرة بكلبي فد يوم اروح لصيدلية ويسألني الصيدلي اذا عندي اعراض جانبية للداو اللي يبيعه الي واحدهم كاعد مثل البكال .. خو الاطباء ما اريد احجي عليهم لا تطك مرارتي من اتذكر سوالفهم
ويكولك حكومة فاسدة وحرامية دشوفوها طالعة من رحم هيجي ثقافة شنو يكون الناتج يعني ؟؟

الجمعة، 11 مايو 2012

هل العراق شخص حباب ومظلوم ؟؟

كلما انتقدت الوضع بالعراق يطلع دعاة الوطنية بجملتهم الشهيرة "ليش تحجي على بلدك اللي تربيت بيه" وطبعا هذه الجملة دائما تصدر ممن ترعرعوا خارج العراق البائس !! ومن اشرح لهم الوضعيةالكسيفة وبعد جر وعر ومط  .. بكل وقاحة يكولون اي هو العراق ابتلى بهذا الشعب 
هذه الجملة اللي تصفن الزمال ليش هو شنو العراق؟؟ قابل هو شخص لو رجال او فد كائن منفصل ؟ مو هو عبارة عن ارض عايش عليها شعب فأذا الشعب اغلبه جهلة وموخوش اوادم  شبقى من العراق؟؟ يعني قابل نحجي على الكاع مثلا لو المكان؟؟

خوو الجماعة اللي بعدهم عايشين بوهم المؤامرة هذولة اصلا الطبيب مانعني من النقاش وياهم  .. ورح اظل اكول  بأن سبب مصائبنا هو التخلف والعفن اللي محشش بعقولنا لا مالكي ولاصدام ولا بطيخ   .. ورح اظل اكول ان العراق باائس وتعباون وعاوي شعبا وارضا الى ان نعّي  على انفسنا ونصحح كل الاخطاء او على الاقل نتعلم منها